სტატისტიკური დამოუკიდებლობა წარმოადგენს კერძო შემთხვევას, რომლისთვის $A$ ხდომილების პირობითი ალბათობა, $B$ ხდომილების პირობით, $A$-ს უპირობო ალბათობის ტოლია, ანუ $$P(A|B)=P(A).$$ აღნიშნულს ადგილი აქვს მაშინ, როდესაც რაიმე ხდომილების განხორციელების ალბათობა საერთოდ არ არის დამოკიდებული სხვა ხდომილების განხორციელებაზე. ამგვარი ხდომილებების მაგალითებად შეიძლება დავასახელოთ:

• თბილისში საცობების რაოდენობა დღის განმავლობაში ($A$) და რიო დე ჟანეიროში ნალექის მოსვლა ($B$)
• ეკონომიკური ზრდა ევროპაში ($A$) და ილიას უნივერსიტეტში სტუდენტთა ლექციებზე დასწრების პროცენტული მაჩვენებელი ($B$) და სხვ.

ვთქვათ, მოცემულია $A$ და $B$ ხდომილება. ამ ხდომილებებს ეწოდება სტატისტიკურად დამოუკიდებელი მაშინ და მხოლოდ მაშინ, თუ $$P(A\cap B)=P(A)P(B).$$ გადამრავლების წესის თანახმად, აქედან აგრეთვე გამომდინარეობს, რომ $$P(A│B)=P(A)P(B│A)=P(B)$$ მაგალითი. წინა მაგალითიდან გამომდინარე (სწრაფი კვების მომხმარებელთა $75\mathrm{\%}$ საჭმელს სოუსად ირჩევს კეტჩუპს, $80\mathrm{\%}$ – მაიონეზს და $65\mathrm{\%}$ – ორივეს) აჩვენეთ, არის თუ არა ხდომილებები „მაიონეზის მოყვარული“ და „კეტჩუპის მოყვარული“ სტატისტიკურად დამოუკიდებელი.

ამოხსნა. სტატისტიკური დამოუკიდებლობის განსაზღვრების თანახმად, $$P(K)P(M)=P(K\cap M),$$ მაგრამ $$P(K)P(M)=75\mathrm{\%}\cdot 80\mathrm{\%}=60\mathrm{\%},$$ მაშინ, როდესაც $$P(K\cap M)=65\mathrm{\%}.$$ ამგვარად, $K$ და $M$ ხდომილებები არ არის სტატისტიკურად დამოუკიდებელი. აღნიშნული შედეგი შეესაბამება ჩვენს ინტუიტიურ აღქმას – დიდი ალბათობაა, რომ კეტჩუპის მოყვარული საჭმელთან აგრეთვე სხვა სახის სოუსსაც მიირთმევს.