ვთქვათ, მოცემულია $ A $ და $ B $ ხდომილება. $ A $ ხდომილების პირობითი ალბათობა, $ B $ ხდომილების განხორციელების პირობით, აღინიშნება სიმბოლოთი $ P(A | B) $ და გამოითვლება ფორმულით $$ P(A │B)= \frac{P(A \cap B)}{P(B)}, $$სადაც $ P(B)>0. $

მაგალითი. სწრაფი კვების მომხმარებელთა $ 75\% $ სოუსად ირჩევს კეტჩუპს, $ 80\% $ – მაიონეზს და $ 65\% $ – ორივეს. რა არის ალბათობა იმისა, რომ მაიონეზის მოყვარული მოიხმარს კეტჩუპსაც და კეტჩუპის მოყვარული მოიხმარს მაიონეზსაც.

ამოხსნა. მოცემული გვაქვს, რომ $ P(K) = 75\%, P(M) = 80\%, P(K \cap M)=65\% $. ალბათობა იმისა, რომ მაიონეზის მოყვარული მოიხმარს კეტჩუპს არის $ K $ ხდომილების ალბათობა $ M $ ხდომილების პირობით: $$ P(K │M)= \frac{P(K \cap M)}{P(M)}= \frac{0.65}{0.8}=0.8125 $$ ანალოგიურად, $$ P(M │K)= \frac{P(K \cap M)}{P(K)}= \frac{0.65}{0.75}=0.8667. $$

ალბათობების გადამრავლების წესი

ვთქვათ, მოცემულია $ A $ და $ B $ ხდომილება. ალბათობების გადამრავლების წესის მიხედვით, $ A $ და $ B $ ხდომილებების თანაკვეთის ალბათობა შეიძლება შემდეგნაირად იქნას გამოყვანილი პირობითი ალბათობიდან: $$ P(A \cap B)=P(A│B)P(B),$$ სადაც $ P(B)>0. $ აგრეთვე, $$ P(A \cap B)=P(B│A)P(A), $$ სადაც $ P(A)>0. $